Shugaban majalisar dattawan ya tsaya takarar fidda gwani ta shugaban Najeriya amma bai samu nasara ba, inda hakan ya tayar da batun komawa kan kujerar sa ta majalisar dattawa.
Hatta shugaban jam’iyyar Abdullahi Adamu da ke mara baya ga Ahmed Lawan ya gargadi Machina da yin takatsantsan kan kalmomin da ya ke furtawa da su ka saba da muradun jam’iyyar.
Mai sharhi kan lamuran yau da kullum Bashir Baba ya ce wannan wani sauyi ne da ke nuna rashin adalcin makalewa kan mukami ta kowane hali.
Shi kuma masanin kimiyyar siyasa Dr. Farouk BB Farouk ya nuna hakan ba bakon abu ba ne ga jam’iyyu amma ya yi karantsaye ga tanadin dimokradiyya na ba da dama kowa ya tsaya takara matukar ya cancanta.
Za a jira a ga ta inda jagororin APC za su bullowa wannan sabuwar dambarwar da ke kawo musayar kalamai masu zafi.
APC na gwagwarmayar ganin ta dore da mulki bayan saukar shugaba Buhari a 2023 da hakan ke sa daukar matakai masu kawo cecekuce.
Saurari cikakken rahoton cikin sauti:
