Kamar yadda bayanai suka tabbatar,yan bindiga masu tada kayar bayan na Boko Haram sun gamu da ajalinsu lokacin da suke yunkurin kai wani harin sari-ka-noke, a yankin bakin Dutse,dake karamar hukumar Madagali,wanda ke kusa da dajin Sambisa.
Wani mazauni yankin yace yan yakin sakai na maharba ne suka soma yin artabu da wadannan yan Boko Haram a bakin dutsin da suka fafata har aka kashe wani dan sakai kodayake suma maharban sun sami nasarar kai wasu yan Boko Haram lahira.
A sanarwar da hedikwatar rundunan sojin Najeriya ta fitar dake dauke da sa hannun daraktan yada labarai na rundunan, Birgediya Janar Texas Chukwu,ta tabbatar da nasarar da aka samu kan mayakan na Boko Haram a yankin na Madagali.
Da yake karin haske shi ma Yusuf Muhammad shugaban karamar hukumar Madagali ya yaba da wannan sabon yunkuri.
Kamar yadda kididdiga ke nunawa rayuka da dama ne suka salwanta baya ga wadanda ke gudun hijira sanadiyar balahirar Boko Haram musamman a arewa maso gabashin Nigeria
Ga rahoton Ibrahim Abdulaziz da karin bayani
Facebook Forum