Wani Harin Kunar Bakin Wake Ya Kashe Jami'an Soji A Kabul

'Yan sanda a Afghanistan, sun ce, wani harin kunar bakin wake rataye da bam, a kusa da wata makarantar horar da sojoji a Kabul, ya kashe a kalla jami’an tsaro shida, wasu 16 kuma sun jikkata.

Ma’aikatar harkokin cikin gidan kasar, ta tabbatar da harin bam din, na yau Alhamis a bakin kofar jami’ar Marshal Fahim National Defense, da ke babban birnin kasar, amma ba ta bada karin bayani ba.

Wasu jerin hare-hare da aka kai kwanan nan a Kabul, sun kashe mutane da dama, ciki har da wani babban malamin addinin Islama.

Sojojin Afghanistan, sun kai farmaki a wata cibiyar tsare mutane ta ‘yan Taliban, a kudancin lardin Zabul, dake fama da tashin-tashina, inda suka sako 'yan fursunoni 18, ciki har da jami’an tsaro 12.