‘Yan jam’yar Republican a majalisa suna matsawa fadar shugaban kasa ta White House lamba ta fitar da faifan tattaunawa shugaba Donald Trump da darektan hukumar binciken manyan laifuka ta Amurka FBI James Comey da aka kora, idan an nadi tattaunawar.
Faifan tattaunawar zai warware kace na nace da ake yi kan ko Trump ya bukaci Comey wanda yake jagorantar binciken da ake gudanarwa kan shish-shigin da ake zargin Rasha tayi a zaben shugaban kasar Amurka da aka gudanar bara, ya dakatar da binciken da hukumar ke gudanarwa a kan wanda Trump ya fara zaba a matsayin mai bashi shawarwaci kan harkokin tsaro, Micheal Flynn. Trump ya kori Flynn sabili da yin karya a kan huldarsa da jakaden Rasha a Washington.
A bayanin da yayi gaban ‘yan majalisa makon da ya gabata, Comey ya bada bahasi cewa, yana jin Trump yana so ya daina binciken ne, lokacinda ya gaya mashi cewa, yana fata Comey zai yi watsi da binciken Flynn.
Trump yace bayanan Comey akan tattaunawar da suke yi a kan Flynn ba daidai bane.
Facebook Forum