An kashe mutane akalla uku a wani harin bam na kunar bakin wake da aka kai cikin mota yau lahadi a wata majami’a dake yankin tsakiyar Najeriya.
Hukumomi sun ce an kai harin na yau ne kan majami’ar COCIN dake garin Jos a Jihar Filato, daga inda wakiliyarmu Zainab Babaji ta aiko mana da wannan rahoton...
| Saurari Rahoton Zainab Babaji Daga JOS |
To, ‘yan kilomitoci kadan daga garin na Jos a karamar hukumar Toro mai iyaka da jihar Filato a cikin Jihar Bauchi kuma, jami’an tsaro sun damke wasu matasa dauke da makamai da wasu abubuwan da ake kyautata zaton cewa bama-bamai ne, su na niyyar kai farmaki a kan irin wannan majami’a ta COCIN a kauyen Miya Barkatai.
| Saurari Rahoton Abdulwahab Muhammad Kan Yunkurin Harin Toro |
Wadannan al’amura su na zuwa ne a bayan da hukumomi suka kafa dokar hana fita waje baki daya a Gombe, dake arewa maso gabashin kasar, bayan farmakin da aka kai har aka kashe mutane akalla 12 a hedkwatar ‘yan sandan garin ranar jumma’a. ‘Yan sanda ba su tabbatar da ko wadanda suka mutu duka ‘yan sanda ba ne, amma su na tsammanin cewa kungiyar nan ta Boko Haram ce ta kai harin. Hukumomi sun yi nasarar fatattakar hari na biyu da aka kai kan gidan kurkukun garin na Gombe.
