Jami’an diflomasiyyar Rasha da kasar Burtaniyya ta bada umurnin a kore su daga bakin aiki saboda harin gubar da aka kai a kasar ta Burtaniyya na shirin barin kasar.
Kafafen yada labaran Rasha sun bada rahoton cewa an ga wata babbar motar kwasar kaya a wajen ofishin jakadancin Rasha dake birnin London yau Talata.
Kasar Burtaniyya dai ta bada umurnin a kori jami’an diflomasiyyar ne a makon da ya gabata, bayan da ta dorawa Rasha laifin kaiwa wani tsohon jami’in leken asirin Rasha, Sergei Skripal da diyarsa Yulia harin guba a garin Salsbury dake Burtaniyya a farkon watan nan.
Ita ma Rasha ta mayar da martani inda ta kori jami’an diplomasiyyar Burtaniyya 23, wadanda su ma ake sa-ran zasu bar birnin Moscow cikin ‘yan kwanaki masu zuwa.
Rasha ta kuma musanta cewa tana da hannu a harin gubar da aka kai.
Facebook Forum