Matasan sun saki wasu mutane shida da ‘yan sanda suka kama a matsayin masu fashi da makami tare da marigayin.
A cewar shedun gani da ido, zanga zangar da matasan suka yi ta rikide ta zama mummnan tashin hankali a tashar ‘yan sanda suna kalubalantar ‘yan sanda da zargin mutanen da fashi da kuma kashe mutum daya.
Matasan sun ce mutumin da aka kashen ba dan fashi da makamin bane, suna kira a gurfanar da duk wanda ya kashe shi gaban doka.
Masu zanga zangar sun lalata motoci dake ajiye a shelkwatar ‘yan sandan yankin, yayin da wasu karin jami’an tsaro suka isa wurin domin kawo kwanciyar hankali da oda.
Shedu sun ce ‘yan sandan sun yi ta harbin gargadi domin tarwatsa masu zanga zangar.
Tun da fari, matasan sun tare hanyar garin kana suka kona tayoyi kafin lamarin ya kara ta’azzara kana suka wuce zuwa tashar ‘yan sanda suka kai hari a wurin.
