Hadarin ya auku ne bayan da motarsu ta taka nakiya a kauyen Dargol da ke yankin Tillaberi iyakar kasar ta Nijar da Burkina Faso.
A wata hira ta wayar tarho gwamnan jihar Tillaberi, Tidjani Ibrahim Katchiella, ya bayyanawa Muryar Amurka cewa lamarin ya faru ne a daidai lokacin da wadannan jami’ai ke kokarin isa rumfunar zabe.
Jamhuriyar Nijar na daga cikin kasashen Sahel masu fama da hare haren ta’addanci ta bangaren jihohin Tillaberi da Tahoua bayan da kungiyoyin ‘yan bindiga suka tare a arewacin Mali a shekarar 2012.
Yayin da kuma kungiyar Boko Haram ke kai farmaki akai akai a jihar Diffa da ke yankin kudu maso gabashin kasar da ke iyaka da Tarayyar Najeriya.
Tabarbarewar tsaro a jihohin Zamfara da Sokoto da Katsina inda masu garkuwa da mutane don neman kudin fansa da barayin shanu ke sheke ayarsu wata matsala ce da ta shafi kasar ta Nijar ta bangaren jihar Maradi.
