A wani al’amari mai kama da martani ga kungiyar kare hakkin bil Adama ta Duniya Amnesty International, da a baya ta zargi sojojin Najeriya da cin zarafin bil Adama. Hukumar kare hakkin bil Adama ta Najeriya ta wanke sojojin Najeriyar.
A cewar babbar sakataren hukumar ta Najeriya, Mrs Oti Ovrawah, tace hukumar na farin cikin fadin cewa rundunar sojan Najeriya ta na la’akari da muradun kare hakkin bil Adama, a duk yake-yaken da ta keyi da ‘yan ta’adda wanda ke da muhimmanci ga ‘yan Najeriya.
Tun da farko sai da babban hafsan sojan Najeriya, Janal Tukur Buratai, yace dakarun kasar basa wani rufa-rufa game dangane da batun kare hakkin bil Adama, inda ya ci gaba da cewa basu da wani abu da zasu boye, idan aka duba ganin cewa dokokin aikin soja suna kare Muradin ‘kasa da kuma kare dukiya da rayukan jama’a ne.
Zargin da kungiyar Amnesty International ta yi wa dakarun Najeriya, ya haifar da cece-kuce a cikin ‘kasar.
Darakta janal na hukumar wayar da kan jama’a ta Najeriya, Dakta Garba Abari, na ganin abubuwan da suka faru a kasar zai zamanto darasi ne ga kungiyar Amnesty International.
Domin karin bayani saurari rahotan Hassan Maina Kaina.
Facebook Forum